Forcimi i qeverisjes vendore dhe shërbimeve për komunitetin në Shqipëri

Këtë javë patëm kënaqësinë të mirëpresim në Shqipëri Drejtorin Ekzekutiv të Helvetas, Melchior Lengsfeld, dhe Drejtorin Rajonal për Evropën Lindore dhe Juglindore, Matthias Herr. Vizita e tyre kishte si qëllim të shihte nga afër rezultatet e punës së përbashkët me bashkitë, sidomos në fushën e qeverisjes vendore, përmirësimit të shërbimeve dhe zhvillimit të komuniteteve.

Vizita nisi në Kukës, ku delegacioni u takua me përfaqësues vendorë nga Bashkia Kukës dhe këshilltare nga Mirdita e Hasi, për të mësuar më shumë për punën dhe arritjet e tyre, por edhe me vështirësitë që kanë hasur gjatë rrugëtimit të tyre politik vendor. Po ashtu u prezantua edhe puna për përfshirjen e fëmijëve me nevoja të veçanta në institucionet parashkollore. Sukses tjetër i prezantuar ishte heqja e tarifave për gratë kryefamiljare falë përvojës së këshilltareve në nismën “Gratë në politikë” të mundësuar nga Projekti Bashki të Forta.

Në Bashkia Kamez, delegacioni vizitoi një kopsht dhe një çerdhe në Paskuqan për të parë nga afër përmirësimet në standardet e kujdesit dhe aksesit për familjet në zonat informale. Një ndalesë në zonën e Liqenit të Paskuqanit dhe më pas në pedonalen e Bathores tregoi punën për hapësira të gjelbra, menaxhimin më të mirë të mbetjeve dhe projektimin urban me fokus komunitetin.

Si një simbolikë për promovimin e rritjes së sipërfaqeve të gjelbra në zonat urbane, të dy drejtorët e Helvetas, së bashku me Kryetarin e Bashkisë Kamëz Rakip Suli, mbollën një pemë në Paskuqan. Ky veprim nënvizon angazhimin e përbashkët për mjedise më të shëndetshme dhe cilësi më të mirë jete për banorët.

Dita u mbyll me takimin e stafit të Helvetas Albania në Tiranë, ku u diskutua mbi rezultatet, sfidat dhe drejtimet e ardhshme të punës.

Këto vizita tregojnë edhe një herë rëndësinë e bashkëpunimit mes bashkive, qytetarëve dhe organizatave të zhvillimit për të krijuar shërbime më cilësore, më të qëndrueshme dhe më gjithëpërfshirëse për komunitetet në Shqipëri.