Shkodra mirëpret delegacionin e Sida-s për të diskutuar qeverisjen vendore, zhvillimin dhe integrimin evropian

Të premten Bashkia Shkodër dhe Këshilli Bashkiak Shkodër mirëpritën një delegacion të Agjencisë Suedeze për Bashkëpunim Ndërkombëtar dhe Zhvillim (SIDA) (Embassy of Sweden in Tirana), i përbërë nga Hanna Hellquist (Drejtoreshë e Përgjithshme në detyrë e Sida-s) dhe Sofia Hafdell (Koordinatore e Bordit dhe Këshilltare e Stafit Drejtues), Edvard Agrell, Martin Ängeby, Erik Illes.

Delegacioni suedez u takua me përfaqësues të qeverisjes vendore, përfshirë nënkryetarin e bashkisë, anëtarë të këshillit bashkiak dhe drejtues të administratës vendore. Gjatë vizitës, ata u njohën nga afër me ambientet e Bashkisë Shkodër dhe funksionimin e Këshillit Bashkiak.

Në takimet e zhvilluara, përfaqësuesit suedezë dhe drejtuesit vendorë diskutuan mbi reformën administrative-territoriale, mbështetjen që Suedia ofron përmes programeve të ndryshme të zhvillimit, përfshirë projektin Bashki të Forta, përfaqësimin e grave në politikë, instrumentet për forcimin e kapaciteteve të qeverisjes vendore, si Akademia e Qeverisjes Vendore, si dhe përmirësimin e performancës së institucioneve vendore. Vëmendje e veçantë iu kushtua gjithashtu bashkëpunimit me sektorin privat dhe rolit të tij në zhvillimin ekonomik lokal.

Gjatë takimit u ritheksua angazhimi i Suedisë për të vazhduar mbështetjen ndaj Shqipërisë në procesin e integrimit evropian dhe në rrugëtimin e saj drejt anëtarësimit në Bashkimin Evropian.